Në rajonin e Likovës janë lokalizuar të gjitha vatrat e virusit Kovid-19. Nga Qendra e Shëndetit Publik thonë se për dallim nga Kumanova ku vatër ishte spitali i qytetit, në Likovë vatër e virusit janë familjet e mëdha. Testimi masiv do të vazhdojë edhe javën e ardhshme. Për momentin ka mbi 200 raste aktive.
Ky numër është shumë më i madh se gjysma e Maqedonisë lindore. Qytetarët deri tani nuk kanë dashur të testohen, nuk i besojnë virusit dhe lejuan që situata të jetë e tillë. Të gjitha vatrat i kemi nën kontroll, por çdo ditë ka vatra të reja”-tha Arif Latifi, drejtor i QSHP-së, Kumanovë.
Reparti infektiv në Spitalin e Qytetit po trajton kryesisht pacientë nga Likova. Specialisti Aziz Bajrami i cili ishte një nga të prekurit me Kovid-19 flet për terapinë që i jepet pacientëve. Ai apelon qytetarët të mos e neglizhojnë seriozitetin e virusit.
Antibiotik, infuzione, terapi vitaminoze ndërsa ato të cilët janë në gjendje më të vështirë merret dhe analizohet gjendja e saturacionit me oksigjen. I jepet edhe terapi me oksigjen”-pohoi Aziz Bajrami, infektolog.
Kryetari i Likovës, Erkan Arifi kërkon nga qytetarët t’i nënshtrohen testiti. Ai thotë se në Likovë situata është e qetë por akoma nuk është tërësisht nën kontroll.
Situata është e qetë por nuk do të thotë se e kemi tërësisht nën kontroll. Kemi shumë raste pa simptoma. Në ato familje që ka të infektuar pa simptoma të shtohen testet dhe të ndalohet shpërndarja e virusit. Nuk është turp të testohesh. Duhet patjetër të përballemi me situatën reale në të cilën ndodhet i gjithë vendi dhe bota”-theksoi Erkan Arifi, kryetar i Likovës.
Përveç rasteve aktive, rajoni Likovës ka regjistruar numër të madh të viktimave si pasojë e Kovid-19.
