Ballina Top Lajm Epidemitë, politika dhe konfliktet: Anulimet e Haxhit ndër shekuj

Epidemitë, politika dhe konfliktet: Anulimet e Haxhit ndër shekuj

Koronavirus mund ta anulojë Haxhin për herë të parë që nga themelimi i Arabisë Saudite, por viti 2020 do t’i bashkohet një liste të gjatë të viteve që kanë penguar ngjarjen vjetore

Arabia Saudite të martën hodhi idenë që Haxhi i këtij viti të anulohet, duke u bërë thirrje pelegrinëve të shtyjnë përgatitjet dhe prenotimet e udhëtimit për shkak të frikës së pandemisë së koronavirusit .

Rreth dy milion njerëz vizitojnë Mekën për të kryer pelegrinazhin vjetor, i cili këtë vit ishte caktuar të fillojë në korrik, por planet janë hedhur në dyshim pasi mbretëria ka regjistruar 1.563 raste të koronavirusit dhe dhjetëra vdekjeve.

Si shumë vende, Arabia Saudite ka zbatuar një bllokim dhe një shtetrrethim në një përpjekje për të frenuar përhapjen, dhe hyrja në qytetet e shenjta të Mekës dhe Medinës është kufizuar. Riadi tashmë ka pezulluar Umrenë.

Muhamed Salih bin Taher Banten, ministër i Haxhit dhe Umresë, tha për një kanal televiziv saudit se myslimanët – të cilët pritet të kryejnë haxhin të paktën një herë në jetën e tyre – duhet të “presin para lidhjes së kontratave”.

“Ne u kemi kërkuar vëllezërve tanë myslimanë në mbarë botën të presin përpara se të bëjnë kontratat derisa gjërat të bëhen të qarta,” tha Banten.

“Në rrethanat aktuale, ndërsa po flasim për pandeminë globale, nga e cila i jemi lutur Zotit të na shpëtojë, mbretëria është e prirur të mbrojë shëndetin e myslimanëve dhe qytetarëve,” shtoi ai.

Megjithëse Haxhi është anuluar disa herë gjatë shekujve, që nga themelimi i Mbretërisë së Arabisë Saudite në vitin 1932 nuk ka munguar në asnjë vit, madje as gjatë pandemisë spanjolle të gripit të viteve 1917-18 që vrau miliona njerëz në të gjithë botën.

 

Por, nëse Arabia Saudite heq dorë nga Haxhi i vitit 2020, ajo do t’i shtohet një liste me pothuajse 40 anulime dramatike që nga e para në 629. Tetova News ju njeh me disa nga anulimet më të habitshme në histori:

865: Masakra në malin Arafat
Gjatë konfliktit të tij me Kalifatin Abasid me qendër në Bagdad, Ismail bin Yousef, i njohur si Al-Safak, nisi një sulm në malin e shenjtë Arafat me pamje nga Meka në 865, duke masakruar pelegrinët atje. Sulmi e detyroi Haxhin të anulohej.

930: Sulmi Qarmatian

Në vitin 930, Abu Taher al-Janabi, shefi i sektit heterodoks të Karmatasve me qendër në Bahrein, filloi një sulm ndaj Mekës.
Tregimet historike thonë se Karmatasit vranë 30,000 pelegrinë në qytetin e shenjtë dhe hodhën trupa në pusin e shenjtë Zemzem. Ata vodhën gjithashtu Xhaminë e Madhe dhe vodhën Gurin e Zi nga Qabeja, duke e çuar në ishullin e Bahreinit.

Haxhi atëherë u pezullua për një dekadë, derisa Guri i Zi të kthehej në Mekë.
Karmatasit ishin një sekt shiit Ismaili që besonte në një shoqëri egalitare dhe e konsideronin pelegrinazhin një ritual pagan.

983: Kalifatet e Abbasidëve dhe Fatimidëve

Edhe politika e ka prishur Haxhin. Në 983 mosmarrëveshjet politike midis sundimtarëve të dy kalifateve – Abasidëve të Irakut dhe Sirisë dhe Fatimidëve të Egjiptit – penguan rrugën e myslimanëve që udhëtonin për në Mekë për pelegrinazh. Do të kalonin tetë vjet derisa të mbahej përsëri Haxhi, në 991.

1831: Murtaja

Jo vetëm konfliktet dhe masakrat e kanë anuluar Haxhin. Një epidemi nga India goditi Mekën në 1831 dhe vrau tre të katërtat e pelegrinëve atje, të cilët kishin duruar javë të tëra udhëtimi nëpër tokat e rrezikshme dhe shterpë për të kryer Haxhin.

1837-1858: Seri epidemish

Në një periudhë prej gati dy dekadash, Haxhi u ndalua tri herë, duke ua pamundësuar pelegrinëve të shkonin në Mekë për gjithsej shtatë vjet.

Më 1837, një epidemi tjetër goditi qytetin e shenjtë, duke i lënë gjërat në pritje deri më 1840.

Pastaj në 1846 një kolera goditi Mekën, duke vrarë më shumë se 15,000 njerëz dhe pllakosur banorët e saj deri në 1850. Kolera u rikthye në 1865 dhe 1883.

Në 1858, një tjetër pandemi globale e kolerës mbërriti në qytet, duke bërë që pelegrinët egjiptianë të iknin masivisht në brigjet e Detit të Kuq të Egjiptit, ku u mbajtën në karantinë./TetovaNews

@tn.lajmelokale
@tetovanews