Ballina Aktualitet 30 sekondat që shkatërruan Durrësin dhe Thumanën, çfarë ka mbetur nën rrënoja...

30 sekondat që shkatërruan Durrësin dhe Thumanën, çfarë ka mbetur nën rrënoja (FOTO)

Nuk ishin shumë, por ishin aq të tmerrshme ato 30 sekonda të 26 nëntorit, sa shkaktuan tragjedinë më të rëndë natyrore në të paktën 40 vitet e fundit.

Jetët e humbura ndoshta bënë gjumin më të keq të asaj nate, teksa prisnin të vijon rutinën e përditshme. Por, pas asaj që ndodhi Durrësi dhe Thumana i ngjajnë një fushëbeteje të denjë për luftë.

Dhjetëra godina të shkatërruar e shumë njerëz në kërkim të një strehe. Shumë të tjerë ndajnë dhimbjen për jetën e humbura e duan të rikthehen në banesat e tyre, me shpresën se ka mbetur ndonjë kujtim i bukur, që nëse nuk e gjejnë do mbetet pengu i tërë jetës.

Në sheshet e pallateve të shembur tashmë dëgjohen vetëm zhurmë të makinerive që po shembin atë çka mbeti, duke lënë nën rrënoja 24 jetë: fëmijë, burra e gra, të moshuar e familjarë që u ndanë nga kjo jetë në krahët e njëri-tjetrit.

Në rrugicat mes pallateve dëgjohen bisedat e atyre pak banorëve që kanë mbetur në Thumanë, të cilët fatmirësisht i mbijetuan lëkundjeve të fuqishme. Padiskutim që kryefjalë për ta është tërmeti, teksa duan informacion për ata që mbijetuan dhe për gjendjen e tyre shëndetësore mbi të gjiha.

Ka edhe nga ata që kërkon të jenë më të informuar mbi identitetin e viktimave. Në mesin e dhimbjes së papërshkueshme për jetët e humbura, Thumana, nën rrënojat e saj, përcolli me zë të fortë historitë e heronjve të heshtur të kësaj tragjedie, forcat e ekipeve të shpëtimit!

Mes rrënojave është daja ie Drita Cakonit, vajzës 15-vjeçare që humbi jetën së bashku me babain e saj, Kastriot Cakonin. Imazhin e tij e pamë ditën e tërmetit, kur i dëshpëruar me një pasaportë në dorë kërkonte të dinte për fatin e mbesës së tij, nëse ishte në spital apo në morg. Rrënojat nuk e kanë fshehur kujtimin e Dritës. Sot ai gjen librin e saj të preferuar “Princi dhe Varfëri”, dëftesat dhe fotografitë e 15-vjeçare, që ai e quan tashmë engjëllin e tij.

Një fotografi nga babai i saj i cili kishte humbur jetën disa ditë para tërmetit po e kërkon edhe Geralda Ceco. Deri më tani, nuk ka mundur të gjejë dot asgjë që për të do të ishte kujtimi i vetëm nga babai.

“Kam pasur në banesë motrën tetraplegjike, nënën që është invalide dhe gjyshen e moshuar. Kemi zbritur nëpër shkallë, dhe kur kemi zbritur ishte shembur kati i tretë dhe nuk mund të ngjiteshim më. I kemi bërë një kornizë. Shumë e vështirë për t’u gjetur”, shprehet Geralda. Edhe gjyshja me nipërit e saj, thotë se përveç jetës nuk ka më asgjë tjetër. “Çdo gjë na ka humbur, çdo gjë që kemi punuar gjithë jetën, ja ku janë”.

VIDEO bonus:
Loading...