Disa ditë më parë u përfol se kryedeomkrati Lulzim Basha kishte shkuar për një takim sekret larg vëmendjes së medias në Presidencë me Ilir Metën.
Vizita e Bashës te Kreu i Shtetit erdhi në kulmin e krizës politike, ndaj interesi ishte i madh për të mësuar se çfarë kanë diskutuar të dy. Basha ka thënë në “News24” nga Gjermania se takimi nuk kishte asgjë misterioze dhe se ka shprehur pikëpamjet e tij për situatën në vend e njëkohësisht ka dëgjuar pikëpamjet e Presidentit.
“Ka qenë një takim ditën e martë të javës së kaluar, i cili ka zgjatur afro 35 minuta dhe ka qenë një takim tek i cili kam parashtruar pikëpamjet e mia për momentin ku ndodhet vendi dhe kemi shkëmbyer mendime për situatën e vendit. Asgjë misterioze, ka qenë një takim normal. Unë kam parashtruar pikëpamjet e mia dhe kam dëgjuar pikëpamjet e Presidentit”, deklaroi Basha.
