Mediat serbe nuk lënë gjë pa shpallur si “provokacja”, kur është fjala për shqiptarët. Kështu ka bërë së fundi edhe “novosti.rs”, duke iu referuar një ndeshjeje hendbolli:
“Komentatori shqiptar i Televizionit Shtetëror të Maqedonisë së Veriut, Mustafa Ademi, nuk dëshiroi t’ia thoshte emrin Stojançe Stoilovit gjatë ndeshjes së Kampionatit Botëror të Hendbollit, por i referohej gjatë gjithë kohës me “lojtari me numër pesë”.
Konflikti filloi të acarohej në fund të vitit të kaluar, kur Stoilov u gjend i kritikuar gjerësisht. Ai u largua nga ceremonia e shpalljes së sportistëve më të mirë të vitit në Maqedoni (vetë fitoi çmimin hendbollisti i vitit), kur një nga fituesit filloi të fliste në gjuhën shqipe”.
Ndërkohë, mediat në Maqedoninë e Veriut, më konkretisht, “infosport.mk”, e shtjellon më tej këtë incident: “Stolilov tha se ndjeu ofendim, kur pa dikë që fliste në një gjuhë tjetër nga e vendit të tij, gjë për të cilën hasi në një valë kritikash, megjithëse kishte shumë njerëz që e mbështetën.
Përgjigja e shqiptarëve arriti në fillim të Kampionatit Botëror të Hendbollit, kur komentatori nga televizioni shtetëror, Mustafa Ademi, ka refuzuar vazhdimisht të shqiptojë emrin e Stoilovit gjatë gjithë transmetimit”.
