Ballina Sport Cikalleshi i “shkel syrin” Panuccit, gol në Kupën e Turqisë (Video)

Cikalleshi i “shkel syrin” Panuccit, gol në Kupën e Turqisë (Video)

Kupa e Turqisë është habitati i preferuar i Sokol Cikalleshit. Sulmuesi shqiptar rezultoi edhe njëherë tjetër vendimtar në këtë kompeticion duke realizuar golin e tij të dytë sezonal me fanellën e Goztepe që erdhi sërish në Kupë.

Cikalleshi u aktivizua titullar në sfidën e parë të raundit të 1/16-ave mes Nazillispor dhe Goztepe. Në minutën e 12-të sulmuesi i përfaqësueses kuqezi realizoi golin që zhbllokoi shifrat, finalizim ky që rezultoi deçiziv deri në minutat e fundit me Goztepen që realizoi dhe dy herë të tjera ndaj skuadrës që militon në kategorinë e 4-t, për një fitore me shifrat 0-3, duke hedhur një hap të sigurt drejt kualifikimit në raundin e 1/8-ave.

Cikalleshi u zëvendësua në minutën e 75-të. Ky ishte goli i 14-të në total në Kupën e Turqisë për sulmuesin kavajas i cili në këtë kompeticion e ka gjetur rrugën e rrjetës edhe me Istanbul Basaksehir e Osmanlispor.

Me këtë gol Cikalleshi i dha një tjetër sinjal trajnerit të kombëtares shqiptare Christian Panucci se po kalon një formë shumë të mirë dhe meriton të grumbullohet sërish në ekipin përfaqësues.

LAJMET MË TË REJA
Loading...