Në mesin e 126 personave të shtruar në spital si pasojë e flakëve që kanë përfshirë periferinë e Athinës raportohet të ketë edhe disa shqiptarë.
Shumica e të plagosurve që janë shtruar në spital rezultojnë të kenë djegie në trup dhe probleme me frymëmarrjen.
49 është zyrtarisht numri i personave që flakët që kanë përfshirë periferinë e Athinës u kanë marrë jetën, teksa deri më tani nuk ka asnjë konfirmim zyrtar që mes tyre të ketë edhe shqiptarë. Por fatkeqësisht numri i viktimave pritet që të shtohet, pasi pushteti i flakëve është ende i madh dhe ka shumë zona në të cilën zjarrfikësit ende nuk kanë mundur të hyjnë. Vetëm pranë një restoranti në Mati të Atikës janë gjetur 26 trupa të pajetë.
Ndërkohë raportohet se janë mbi 1000 banesa dhe mbi 300 automjete të shkrumbuara./Tch/
