Ballina Diaspora Shqiptarët, më të diskriminuarit në tregun e punës në Gjermani

Shqiptarët, më të diskriminuarit në tregun e punës në Gjermani

Aplikuesit për punë më të diskriminuar në tregun gjerman janë ata me rrënjë shqiptare.

Spanjollët në anën tjetër janë më të vlerësuar sesa edhe vetë gjermanët, shkruan në raportin e Qendrës Shkencore për Studime Sociale në Berlin (WZB). Raporti është publikuar të martën.

Studimi ka analizuar 6000 aplikues fiktivë me prejardhje të ndryshme mes viteve 2014 dhe 2016. Shumica aplikonin për punë si kuzhinier, mekaniçar ose shitës. Studimi përveç origjinën e prindërve ka marrë parasysh edhe përkatësinë fetare.

Në kohën kur personat vendas merrnin 60 për qind të përgjigjeve pozitive, ata me prindër emigrantë kishin 51 për qind përgjigje pozitive me të njëjtin kualifikim.

Njerëzit me rrënjë nga Afrika dhe vendet myslimane diskriminoheshin edhe më tepër. Si shembull, aplikuesit me origjinë shqiptare merrnin ftesë në intervistë ose ndonjë telefonatë të dytë për pyetje shtesë vetëm 41 për qind.

Ngjashëm negativisht trajtoheshin edhe aplikuesit pakistanezë, domenikanë, etiopianët dhe marokenët.

Diçka kurioze ishte se aplikuesit me emra spanjollë si Alvaro ose Alma Martínez merrnin 73 për qind të përgjigjeve pozitive në pranimin e punës. Në vendin e dytë qëndronin japonezët, më pas polakët dhe zviceranët. Gjermanët qëndronin në vend të pestë.

Pra siç përfunduan studiuesit, punëdhënësit më shumë ishin të interesuar në vlerat dhe kulturat e punëkërkuesit, sesa dallimet e shkollimit.

Studiuesit e përmbyllën analizën se në kohët e ndryshimeve demografike është me interes që të ketë konkurrencë të lirë dhe shanse të barabarta për të gjithë punëkërkuesit pavarësisht se çfarë emri kanë ose nga ku kanë emigruar prindërit e tyre.

@tn.lajmelokale
@tetovanews