Ballina Bota Ish-kryeministri britanik: Populizmi rrezikon ta kthejë Europën në vitet 30-ta

Ish-kryeministri britanik: Populizmi rrezikon ta kthejë Europën në vitet 30-ta

Ish-kryeministri britanik, Tony Blair, thotë se Britania duhet ta shtyjë daljen nga BE-ja.

Një nga mbështetësit më të fortë të qëndrimit të Britanisë në BE ngul këmbë për mbajtjen e një referendumi të dytë në lidhje me këtë çështje.

“Nuk mund të vazhdohet kështu. Nuk kam qenë kurrë më i shqetësuar për të ardhmen e vendit tim se tani.

Vendimin final duhet ta marrë populli, sepse vetëm ai ka të drejtën të vendosë se cilin version të Brexit-it do apo nëse do të qëndrojë a të largohet”, shprehet Blair.

Ish-kryeministri i Britanisë shprehet se përtej ndikimit ekonomik, largimi nga BE-ja do të ketë impakt edhe në politikën e saj, për më tepër me një aleat si presidenti amerikan, Donald Trump.

“Sigurisht ata që e mbështetin Brexit-in, thonë se SHBA-të mbeten aleati më i madh jashtë BE-së. Por shihni realitetin.

Që pas Brexit-it, a është më afër Britania me SHBA-të? A kemi një marrëdhënie me të fortë?

Kur ka çështje me rëndësi globale, cilin në Europë telefonon Trump të parin, kryeministren britanike?”, thotë ai.

Ish-kryeministri laburist shfaq gjithashtu shqetësimin e tij në lidhje me rritjen e populizmit në Europë, si rasti i Italisë. Ai thotë se kjo rrymë mund ta kthejë kontinentin e vjetër në vitin 1930.

“Vala e populizmit që ka përfshirë politikën e Perëndimin nuk tregon shenja zbehjeje. Italia e provon më së miri këtë”, thotë ai.

Sipas Blair, është e vështirë të parashikohet nëse populizmi është në kulmin e tij në këtë moment në Europë apo si do të jetë më vonë.

Por sipas tij, kur të bëhet e qartë se si filozofi politke nuk funksionon, do të ketë shumë zemërim dhe aspak përgjigje efektive.

“Kushedi si mund të zhvillohen dinamikat e një skenari të tillë. Por krahasimi me vitet 1930 nuk duket diçka e largët”, thotë ai.(TemA TV)

@tn.lajmelokale
@tetovanews